1 Corinthians 15

Ukuvuka KukaKhristu Ekufeni

1Bazalwane, ngithanda ukulikhumbuza ngevangeli engalitshumayela kini, elalamukelayo njalo eselimi ngalo. 2Ngalelivangeli liyasindiswa, uma libambelela elizwini engalitshumayela kini. Kungenjalo selikholwe ize.

3Ngoba engakwamukelayo lami ngakudlulisela kini njengokuqakatheke kakhulu: ukuthi uKhristu wafela izono zethu mayelana lemibhalo,

4lokuthi wangcwatshwa, lokuthi wavuswa ngosuku lwesithathu mayelana lemibhalo,

5kanye lokuthi wabonakala kuPhethro, njalo muva kwabalitshumi lambili. 6Emva kwalokho wabonakala kubazalwane abadlula amakhulu amahlanu sikhathi sinye, inengi labo lilokhu lisaphila, lanxa abanye sebalala.

7Wabuya wabonakala kuJakhobe, muva kubaphostoli bonke, 8kwathi ekucineni wabonakala kimi futhi, njengalowo ozelwe ngendlela engajwayelekanga.

9Ngoba mina ngingomncane kubaphostoli njalo kangifanelanga lokuthiwa mphostoli, ngoba ngahlukuluza ibandla likaNkulunkulu.

10Kodwa ngenxa yomusa kaNkulunkulu ngiyilokhu engiyikho, njalo umusa wakhe kawubanga yize kimi. Hatshi, mina ngasebenza kakhulu kulabo bonke – kungayisimi belo, kodwa kungumusa kaNkulunkulu owawukimi.

11Ngakho langabe kwakuyimi loba kuyibo, lokhu yikho esikutshumayelayo, njalo lokhu yikho elakukholwayo.

Ukuvuka Kwabafileyo

12Kodwa uma kutshunyayelwa ukuthi uKhristu wavuswa kwabafileyo, pho bangakutsho kanjani abanye benu ukuthi akukho ukuvuka kwabafileyo na? 13Uma kungekho ukuvuka kwabafileyo, loKhristu kavuswanga phela. 14Njalo uma uKhristu engavuswanga, ukutshumayela kwethu akusizi lutho njalo lunjalo lokholo lwenu. 15Phezu kwalokho singatholakala singofakazi bamanga ngoNkulunkulu, ngoba sifakaze ngoNkulunkulu ukuthi wavusa uKhristu kwabafileyo. Kodwa kamvusanga uma ngempela abafileyo bengavuswa.

16Uma abafileyo bengavuswanga, ngakho loKhristu kavuswanga. 17Uma uKhristu engavuswanga ukholo lwenu luyize; lilokhu lisezonweni zenu. 18Lalabo abafa bekuKhristu balahlekile phela. 19Uma sithembele kuKhristu kulokhukuphila kuphela, sizazwelwa usizi kakhulu kulabantu bonke.

20Kodwa uKhristu wavuswa impela kwabafileyo, izithelo zakuqala zalabo asebelele.

21Ngoba njengoba ukufa kweza ngomuntu, ukuvuka kwabafileyo lakho kuza ngomuntu.

22Ngoba njengoba ku-Adamu bonke besifa, ngokunjalo kuKhristu bonke bazaphiliswa.

23Kodwa yilowo lalowo ngethuba lakhe: UKhristu, oyizithelo zakuqala; muva, ekubuyeni kwakhe, labo abangabakhe. 24Lapho-ke isiphetho sizafika esenikela umbuso kaNkulunkulu uYise emva kokuba esechithe ukubusa konke, lobukhosi kanye lamandla.

25Ngoba kumele abuse uNkulunkulu aze azibeke zonke izitha zakhe ngaphansi kwezinyawo zakhe. 26Isitha sokucina esizachithwa, yikufa. 27Ngoba uNkulunkulu “usebeke izinto zonke ngaphansi kwezinyawo zakhe,” Nxa esithi “izinto zonke” sezibekwe ngaphansi kwakhe, kusobala ukuthi lokhu akugoqeli uNkulunkulu yena ngokwakhe, owabeka izinto zonke ngaphansi kukaKhristu.

28Lapho esekwenzile lokhu, iNdodana uqobo izakuba ngaphansi kwakhe yena owabeka izinto zonke ngaphansi kwakhe, ukuze uNkulunkulu abe yikho konke kukho konke.

29Uma kungelakuvuka ekufeni, pho bazakwenzani labo ababhaphathizelwe abafileyo na? Uma abafileyo bengavuswa, pho kungani abantu bebhaphathizwa ngenxa yabo na?

30Thina-ke, sizifakelani engozini isikhathi sonke na? 31Mina ngifa nsuku zonke – ngitsho khonokho bazalwane – ngeqiniso engiziqhenya ngalo ngani kuKhristu uJesu iNkosi yethu.

32Nxa ngalwa lezilo zeganga e-Efesu ngenxa nje yabantu, ngazuzani na? Nxa abafileyo bengavuswa, “Kasidleni sinathe, ngoba kusasa sizakufa.”

33Lingedukiswa: “Abangane ababi bayasona isimilo esihle.” 34Khumbulani ngezingqondo zenu njengokumele likwenze, licine ukwenza izono; ngoba kulabanye abangamaziyo uNkulunkulu – ngitsho lokhu ukuba liyangeke.

Umzimba Wokuvuswa Ekufeni

35Kodwa omunye angabuza athi, “Abafileyo bavuswa njani na? Bazabuya belemizimba enjani na?” 36Yeka ubuwula! Elikuhlanyelayo akuphili ngaphandle kokuba kufe. 37Lapho lihlanyela, kalihlanyeli umzimba ozakuba khona, kodwa inhlanyelo nje, mhlawumbe eyengqoloyi loba okunye lakho. 38Kodwa uNkulunkulu uyinika umzimba njengokuthanda kwakhe, njalo uhlobo ngalunye lwenhlanyelo ulunika umzimba walo. 39Inyama yonke kayifanani: Abantu balohlobo lunye lwenyama, izinyamazana zilolunye, izinyoni olunye lezinhlanzi olunye.

40Njalo kulezidalwa zasezulwini lezidalwa zasemhlabeni; kodwa inkazimulo yezidalwa zasezulwini ingolunye uhlobo, lenkazimulo yezidalwa zasemhlabeni ingolunye.

41Ilanga lilolunye uhlobo lwenkazimulo, inyanga olunye lezinkanyezi olunye; njalo inkanyezi iyehluka kwenye inkanyezi ngokukhazimula.

42Kuzakuba njalo-ke ngokuvuka kwabafileyo. Umzimba ohlanyelwayo uyabola, uvuswa ungasaboli;

43uhlanyelwa useyiswa, uvuswe ngenkazimulo; uhlanyelwa ubuthakathaka, 44uvuswe usungumzimba womoya. Nxa kulomzimba wemvelo, ukhona njalo lomzimba womoya.

45Ngakho kulotshiwe ukuthi: “Umuntu wakuqala u-Adamu waba yisidalwa esiphilayo;” kodwa u-Adamu wokucina waba ngumoya ophilisayo. 46Owomoya kafikanga kuqala, kodwa owemvelo, emva kwalokho kwafika owomoya.

47Umuntu wakuqala wayenziwe ngothuli lomhlabathi; umuntu wesibili wavela ezulwini.

48Njengoba wayenjalo umuntu wasemhlabeni, banjalo lalabo abangabomhlaba; njalo njengoba enjalo umuntu ovela ezulwini, banjalo labo abangabasezulwini. 49Njalo njengoba silesimo somuntu wasemhlabeni, ngokunjalo sizakuba lesimo somuntu ovela ezulwini.

50Bazalwane, ngithi kini inyama legazi akungeke kudle ilifa lombuso kaNkulunkulu, lokubolayo akulidli ilifa lokungaboliyo.

51Lalelani, ngilitshela imfihlakalo: Kasiyikufa sonke, kodwa sonke sizaguqulwa –

52ngesikhatshana, ngokucwayiza kwelihlo, ngecilongo lokucina. Ngoba icilongo lizakhala, abafileyo bazavuswa bengabolanga, njalo sizaguqulwa. 53Ngoba okubolayo kumele kuzigqokise ngokungaboliyo, lokufayo ngokungafiyo. 54Nxa okubolayo sekugqokiswe okungaboliyo, lokufayo ngokungafiyo, kuzagcwaliseka isitsho esilotshiweyo esithi: “Ukufa kuginyiwe ekunqobeni.”

55“Kungaphi ukunqoba kwakho, wena kufa? Lungaphi udonsi lwakho, wena kufa?”

56Udonsi lokufa yisono, lamandla esono ngumthetho. 57Kodwa kabongwe uNkulunkulu! Uyasinika ukunqoba ngeNkosi yethu uJesu Khristu.

58Ngakho-ke, bazalwane bami abathandekayo, manini liqine. Akungabi lalutho olulinyikinyayo. Zinikeleni kokuphela ngokupheleleyo emsebenzini weNkosi, ngoba liyakwazi ukuthi ukusebenza kwenu eNkosini akusilo ize.